鄉土教學

語言是文化的根，要予文化會當傳承，就要對該己的母語產生興趣佮認同，台灣本土語言流失的情形愈來愈嚴重，有鑑於此，有關的政府單位嘛極力推動母語教育政策，從事教學現場的教師就要擔起傳承的使命，欲按怎予學生合意學習家己的母語？除了家庭教育外，老師的教學抑是重要的關鍵，教學方法愛掌握教學的重點佮學習的要領，然後找出適合學生的需求，比如妥善運用周邊的資源，予語言會當和生活相倚，發揮語言的實用性、趣味性、益智性、啟發性，予教學擱卡多元活潑趣味，必能吸引學生的專注力，達到教學的成效，安爾母語教育才會當真正的落實。

鄉土廣播劇、答喙鼓、童玩教學、資訊科技融入學，有助提昇學生的學習興趣

母語是咱祖先一代一代傳落來的語言，伊包含一个族群的文化佮風俗，嘛是一个人對該己的肯定佮連結族群關係的重要筋脈，咱袂勢予咱的母語佮文化斷根，鄉土教學就是欲予這个語言、文化佮風俗繼續生湠落去，予咱的囡仔瞭解咱的文化咱的根，抱著「學先民的智慧，了解本土的文化，予台語擱生湠，台灣心鄉土情，向望逐家鬥陣來學台語」的精神佮理念來從事教學，因此，教學方式就要講究，用趣味活潑多元的方式，才會當餳（siann5）學生囡仔主動來學習佮參與。

首先，引導囡仔對（ui3）歌唱當中學台語，用通輕鬆快樂擱無壓力的學習法來教學，然後配合「多媒體教學資源光碟」、「佚迌學習」的方法，予囡仔袂排斥有趣味了後才擱沓沓仔加深。低年級對唱歌唸謠學台語開始；中高年級除了課本內容以外，會適時補充教材，比如會加教一寡古詩、童謠、俗諺、激骨仔話、答喙古、節慶風俗、看圖講古…等物件，予學生會當多元來學習，增加知識、語彙能力，以提升學生的學習成就。

除了懸頂所介紹以外，所要思考的問題，就是培養引導學生去探索、思考佮解決問題的能力。比論講臺灣的俗諺，充滿了人生的智慧佮哲理，每句的背後攏有真深的含意，而且押韻趣味，有教化作用，值得教予學生。